Category: Жанылыктар

Кыргыз Республикасынын делегациясы ZTO Cloud Warehouse Science and Technology Co., Ltd. (ZTO CWST) компаниясынын чакыруусу менен Кытай Эл Республикасына иш сапар менен барып, акылдуу логистика жана чек ара аралык электрондук соода тармагында тажрыйба алмашты. Сапар “Манас” эл аралык аэропортунун аймагында бонддук зона түзүү боюнча Кыргызстандын Мамлекеттик бажы инфраструктурасы ААК, “Кыргызстан аэропорттору” ААК жана “Кыргыз почтасы” ААКнын ортосундагы биргелешкен долбоорлордун алкагында өттү. Жолугушууда тараптар логистика, почта-экспресс кызматтары жана инновациялык технологияларды киргизүү боюнча кызматташтык багыттарын талкуулашты. Кытай тарап Кыргызстанга техникалык команда жөнөтүп, биргелешкен логистикалык объекттер боюнча долбоордук сунуштарды иштеп чыгууга даяр экенин билдирди.

“Кыргыз почтасы” ААК Кыргыз Республикасынын Санариптик өнүгүү жана инновациялар министрлиги тарабынан уюштурулган мини-футбол боюнча достук турнирине катышты. Мелдешке ар кандай мекемелерди жана уюмдарды өкүл кылган 10 команда катышып, спорттук маанайда таймашышты. Кыргыз почтасынын командасы биримдикти, спорттук духту жана жеңишке болгон эрктүүлүгүн көрсөтүп, таймаштын жыйынтыгында сыймыктуу экинчи орунга ээ болду — финалда пенальти сериясында гана утулду. Оюнчуларыбызды мыкты жыйынтык менен куттуктайбыз жана жигердүүлүгү, командалык духу жана мыкты оюну үчүн ыраазычылык билдиребиз!

2025-жылдын 30-октябрында “Кыргыз почтасы” ААК Электрондук коммерция ассоциациясы жана Экономика жана коммерция министрлиги тарабынан уюштурулган E-COMMERCE EXPO 2025 Борбор Азиялык форумуна катышты. Форум e-commerce, логистика жана санариптик экономика чөйрөлөрүндөгү тенденциялар менен чакырыктарды талкуулоо үчүн маанилүү аянтча болду. Форумдун алкагында компаниянын өкүлдөрү Борбор Азия өлкөлөрүнөн келген катышуучулар менен биргелешкен долбоорлорду – чек аралар аралык жеткирүү, санарип кызматтар жана туруктуу логистика боюнча – талкуулашты. Ошондой эле маркетплейстер жана финтех-компаниялар менен кызматташтыкты кеңейтүү мүмкүнчүлүктөрү каралды. Бул иш-чарага катышуу менен “Кыргыз почтасы” ААК өлкөнүн жана региондун санариптик өнүгүүсүнө жигердүү салым кошууга, заманбап почта-логистикалык чечимдерди өнүктүрүүгө жана электрондук соодадагы ишенимдүү өнөктөш болууга умтуларын дагы бир жолу тастыктады.

2025-жылдын 28–30-октябрында Бишкек шаарындагы Кожомкул атындагы Спорт сарайында өткөн KyrgyzTransLogistic 2025 атайын тармактык көргөзмөсүнө “Кыргыз почтасы” ААК активдүү катышты. Иш-чара транспорт жана логистика тармактарындагы жергиликтүү жана эл аралык өнөктөштөр менен диалог куруу үчүн маанилүү аянтча болду. Көргөзмө алкагында Кыргыз почтасынын адистери логистика, санариптештирүү жана транспорттук инфраструктураны өнүктүрүү боюнча заманбап тенденцияларды талкуулашып, тажрыйба алмашышты жана өз ишмердүүлүгүндөгү бир катар жаңы демилгелерди тааныштырды. Компания көргөзмөдө түзүлгөн ишкердик байланыштар жана жаралган идеялар Кыргызстандын почта-транспорттук инфраструктурасын натыйжалуу жана туруктуу өнүктүрүүгө өбөлгө болоруна ишеним арта турганын белгиледи.

2025-жылдын 23-октябрында “Кыргыз почтасы” ААКта кызматкерлердин квалификациясын жогорулатуу боюнча салтанаттуу иш-чара өтүп, окутуулардан ийгиликтүү өткөн адистерге сертификаттар тапшырылды. Компания кызматкерлердин кесиптик өсүшүнө өзгөчө көңүл бурат. Жыл башынан бери 22 окутуу курсу уюштурулуп, 1377 кызматкер билим алган — алардын ичинен 327 офлайн, 1050 онлайн форматта окуган. Иш-чара кызматкерлерди шыктандырып, сапаттуу кызмат көрсөтүүнү камсыздоого багытталган демилгелердин бир бөлүгү болду.

Бүгүн “Кыргыз почтасы” ААКта Кытай Эл Республикасынын Шаньси провинциясынын делегациясы менен жолугушуу болуп өттү. Делегацияны КЭРдин Элдик саясий кеңешүү кеңешинин Шаньси провинциялык комитетинин төрага орун басары мырза Сюй Гуанго жетектеди. Жолугушууда тараптар логистика тармагындагы кызматташтыкты кеңейтүү, чек-ара электрондук сооданы өнүктүрүү жана «Кытай – Кыргызстан – Европа» мультимодалдык багытын өркүндөтүү мүмкүнчүлүктөрүн талкуулашты. Кытай тарап Кыргызстанды Борбор Азиядагы маанилүү транспорттук-логистикалык түйүн катары белгилеп, эки тараптуу өнөктөштүктү бекемдөөгө кызыгуусун билдирди. Иш-чаранын жүрүшүндө “Кыргыз почтасы” ААК өзүнүн заманбап логистикалык чечимдерин — Бишкек жана Ош шаарларындагы жаңы почта-логистикалык хабдарды, ошондой эле эл аралык транспорттук коридорлорду өнүктүрүү боюнча долбоорлорун сунуштады. Ошондой эле биргелешип жеткирүү жолдорун натыйжалуу уюштуруу жана электрондук соода тармагына инновациялык чечимдерди киргизүү маселелери талкууланды. Жолугушуунун жыйынтыгында тараптар конструктивдүү диалогду улантуу жана узак мөөнөттүү кызматташтыктын багыттарын иштеп чыгуу ниеттерин билдиришти. Максат — почта-логистикалык инфраструктураны өнүктүрүү…

Бишкек, 2025-жылдын 16-октябры.“Кыргыз почтасы“ ААК, Бүткүл дүйнөлүк азык-түлүк жана айыл чарба уюму (ФАО) менен биргеликте ФАОнун 80 жылдык мааракесине жана Дүйнөлүк азык-түлүк күнүнө карата чыгарылган жаңы почта маркаларынын салтанаттуу мөөр басуу аземин өткөрүштү. Жаңы серия үч маркадан турат. Анда улуттук кийимчен балдар сүрөттөлүп, алар азык-түлүк коопсуздугун, туруктуу айыл чарбаны өнүктүрүүнү жана маданий мураска урмат көрсөтүүнү чагылдырат. ФАО өкүлдөрүнүн демилгеси менен каармандар Телегей («кең талаа»), Береке («береке, молдук») жана Бакыт («бактылуулук») деген аттарга ээ болушкан. Азем мамлекеттик органдардын, эл аралык уюмдардын жана коомчулуктун катышуусунда өтүп, Кыргызстан менен ФАОнун биргелешкен аракеттеринин символуна айланды.

2025-жылдын 9-октябрында, Дүйнөлүк почта күнүнө карата, “Кыргыз почтасы” ААКтын башкы кеңсесинде салтанаттуу куттуктоо иш-чарасы болуп өттү. Иш-чарада “Кыргыз почтасы” ААКтын башкы директору Марат Черикчиев мекеменин ар кыл бөлүмдөрүндө эмгектенип, почта тармагына олуттуу салым кошуп келген кызматкерлерди Ардак грамоталар менен сыйлап, алардын үзүрлүү эмгеги жалпы тармактын өнүгүүсүндө маанилүү экенин белгиледи. Майрамдык иш-чаранын жүрүшүндө Марат Черикчиев “Кыргыз почтасынын” алдыдагы пландары, анын ичинде санариптештирүү, кызмат көрсөтүүлөрдү кеңейтүү жана кардарлар жана почта кызматкерлери үчүн да шарттарды жакшыртуу боюнча демилгелер тууралуу айтып өттү.

Дүйнөлүк почта күнүнө карата “Кыргыз почтасы” ААК өз кызматкерлери арасында стол тенниси, футбол жана аркан тартыш боюнча спорттук турнирлерди уюштурган. Мелдешке мекеменин бардык бөлүмдөрүнөн командалар жана кызматкерлер активдүү катышышты. Турнир жарым финал жана финалдык оюндар менен жыйынтыкталып, мыкты оюн көрсөткөн жеңүүчүлөр 9-октябрда — майрамдык күндө — медалдар, кубоктор жана акчалай сыйлыктар менен сыйланышты. Иш-чарада “Кыргыз почтасы” ААКтын башкы директору Марат Черикчиев мындай мелдештер кызматкерлердин ынтымагын, ден соолугун чыңдоону жана командалык рухту бекемдөөгө чоң салым кошорун белгилеп, мындай демилгелер мындан ары да улантыларын айтты.

Дүйнөлүк почта күнүнө карата Баткен облусунун Кадамжай районунда “Кыргыз почтасы” ААК жергиликтүү бийлик менен биргеликте үч жаңы почта бөлүмүнүн ачылыш аземин өткөрдү. Заманбап байланыш түйүндөрү Алга, Көтөрмө жана Жийделик айылдарында иштей баштады. Салтанаттуу иш-чарага “Кыргыз почтасы” ААКтын башкы директорунун орун басары Уулжан Масиянова, Кадамжай райондук мамлекеттик администрациясынын башчысынын орун басары Мирлан Айтматов жана жергиликтүү тургундар катышты. Жаңы бөлүмдөр аймактык тургундар үчүн почта, логистика жана финансы кызматтарын жеткиликтүү жана ыңгайлуу кылып сунуштайт. Бул демилге айылдардагы кызмат көрсөтүүлөрдүн сапатын жогорулатууга багытталган. Өзгөчө белгилей кетчү жагдай — Жийделик айылындагы бөлүм жергиликтүү элдин жана жаштар уюмунун демилгеси менен “Кыргыз почтасы” ААКнын колдоосу аркылуу курулган.